SVI

Soura de nos
Carateristica dl SVI
Ativité dl SVI
Publicazions
Storia dl SVI
Strutura dl SVI
Curricula
Per contaté l SVI
Impressum


Ativité dl SVI

Enrescida sun i grups etnics

Barat de esperienzes sun les mendranzes a livel internazional

La revista Europäisches Journal für Minderheitenfragen (EJM)

Cooperazion internazionala

Zenter de documentazion per la sconanza dles mendranzes

Projec atuai


Enrescida sun i grups etnics

La chestion di grups etnics é vegnuda, dantaldut do les gran mudazions che é stedes tl’Europa dal 1989 inant sciche conseguenza dla tomeda dl mur de Berlin, na chestion de importanza fondamentala dal pont de veduda di derc dla persona y dla segureza. L SVI à azeté gen la desfida da colaboré a la descuscion soura les finalités y i contegnus de na sconanza dles mendranzes a livel europeich. Do che l SVI à studié y acompagné tl menù l svilup sozio-politich tl Südtirol dai agn 1960 inant, òvel y àl dutaurela duc i recuisic per porté inant chesta enciaria. Si studies tl ciamp dles mendranzes ti à porté al SVI bele ti agn 1990 n bon inom a livel internazional.

Barat de esperienzes sun les mendranzes a livel internazional

L Südtirol à, defront a truepes d’autres mendranzes, na esperienza longia y madura tl ciamp dla sconanza dles mendranzes, che pò ester d’utl te trueps caji a livel europeich. L SVI se prova perchel da mete a desposizion chesta esperienza sudtiroleisa a d’autres regions europeiches caraterisedes da situazions de conflit analoghes. Chest sozed da una na pert tres l’organisazion de viac de stude spezifics tl Südtirol per raprejentanc de d’autres mendranzes y politics y/o funzionars de d’autri raions de mendranza. Al barat de esperienzes sun les mendranzes a livel internazional contribuéscel en particolar ence tres la redazion y la edizion dla revista spezaliseda Europäisches Journal für Minderheitenfragen EJM (fina dl 2012 publiché da la ciasa editoura Springer, Viena/New York, da dailò inant tla ciasa editoura Österreich, Viena).

La revista Europäisches Journal für Minderheitenfragen (EJM)

L Europäisches Journal für Minderheitenfragen / European Journal of Minority Studies EJM (ISSN 1865-1089 [Print], 1865-1097 [Online]) é na revista spezialiseda internazionala y interdisciplinara che vegn fora vigni mez ann sun argomenc che reverda les mendranzes europeiches. Duc si articui vegn valutés, denant che vegnì publichés, tres n prozes de peer-review sciche prevedú dales normes ISSAI 5600 y ISSAI 30 dla International Organisation of Supreme Audit Institutions (www.intosai.org). L EJM vegn dé fora da Christoph Pan (Bulsan), Franz Mascher (Salzburg), Manfred Kittel (Berlin), Matthias Theodor Vogt (Görlitz) y Paul Videsott (Bulsan, editour responsabel).

Dl comité scientifich dl EJM fej pert Anna Gamper (Université de Dispruch), Stephan Garsztecki (Technische Universität Chemnitz), Hans Goebl (Université de Salzburg), Esther Happacher (Université de Dispruch), Peter Jordan (Österreichische Akademie der Wissenschaften, Viena), Klaus-Jürgen Nagel (Universitat Pompeu Fabra, Barcelona), Walter Obwexer (Université de Dispruch), Günther Rautz (Academia Europeica, Bulsan), Oliver Reisner (Ilia State University, Tbilisi), Eduard Werner (Université de Leipzig).

La sconanza dles mendranzes é na materia complessa, per chela che la politica à debojegn de n suport scientifich per la manajé. Te chest contest se dà l EJM ju con chestions che é liedes a la conservazion y l svilup dl’esistenza enstessa y dl’identité linguistica y culturala dles mendranzes y di grups etnics autoctons y tradizionai dl’Europa. I articui dla revista à duc na impostazion interdisciplinara, per ti pité ai esponenc dla scienza y dla politica, tla teoria y dla pratica y a duc i interessés en general a les chestions dles mendranzes informazions fondamentales y atuales. A chesta maniera contribuesc la revista a la descuscion publica y orienteia sun les soluzions plu adatedes.

Homepage:

https://www.bwv-verlag.de/digibib/bwv/apply/content/opus/271769/ o http://www.ejm-digital.de

I articui publichés dal numer 6/2013 inant pò vegnì desćiariés un a un a paiament da la plata internet dla ciasa editoura. I articui plu vedli (ann 1/2008 a 5/2012) è a desposizion, tres a paiament, sun la plata internet dla ciasa editoura Springer:  https://link.springer.com/journal/12241



Cooperazion internazionala

N aspet de importanza primara per l SVI é sia colaborazion con organisazions internazionales per ruvé al svilup y al consolidament de n sistem efizient per la sconanza dles mendranzes a livel europeich. Te chest contest à l SVI bele abù ocajion da prejenté na proposta costrutiva con la publicazion dl Projet de convenzion de Bulsan (1992 y 1994, laoré fora da Felix Ermacora y Christoph Pan y dé fora tl 1993 y 1995 pro Braumüller, Viena, seria Ethnos n. 42 y 46).
L SVI colaboreia souraldut con i organs competenc dl Consei dl’Europa y dl Parlament Europeich (en particolar con l Intergrup per les mendranzes tradizionales dl Parlament Europeich). Partners dl SVI é ence, anter l auter, la Sozieté per la promozion dles mendranzes nazonales tl’Europa/Society for the Enhancement of National Communities in Europe (SENCE) a Turic y l Istitut internazional per l dert dles nazionalités y regionalism/Internationales Institut für Nationalitätenrecht und Regionalismus (INTERREG) a Minca: con ei à l SVI metù a jì dal 2010 inant na ARGE Mendranzes transnazionala per podei profité ciamó deplù di efec de sinergia che la colaborazion dles trei istituzions genereia. Te deplù ocajions colaboreia l SVI ence con l Haus des Deutschen Ostens (HDO) a Minca, l Comité unitar dles isoles linguistiches todesces storiches tla Talia/Einheitskomitee der historischen deutschen Sprachinseln in Italien a Lusern, l Comité nazional federatif per les mendranzes linguistiches dla Talia/Comitato federativo minoranze linguistiche d’Italia (CONFEMILI) a Roma, la Lia per i popui manacés/Gesellschaft für bedrohte Völker (Sezion Südtirol) o la Federazion dles organisazions ungarejes ti Paisc Todesc/Bund Ungarischer Organisationen in Deutschland e.V. (BUOD).


Zenter de documentazion per la sconanza dles mendranzes

L SVI à a desposizion na gran recoiuda de documenc internazionai che reverda la sconanza dles mendranzes. Chesta recoiuda é daverta al publich y pò vegnì consulteda (al vegn damané da se anunzié dantfora). Sun la basa de chesta documentazion met l SVI ence a desposizion informazions spezifiches a chi che fej domanda.

Projec atuai

Atualisazion dl Manual dles mendranzes europeiches/Handbuch der europäischen Volksgruppen, vol. 1: „Les mendranzes tl’Europa“ (pruma edizion 2000)
L prum di entratant trei volums dl Manual dles mendranzes europeiches/Handbuch der europäischen Volksgruppen fova dediché a la determinazion dla consistenza numerica dles mendranzes ti singui stac dl’Europa. I dac (che fajova referiment al ann 2000) é stés la pruma recoiuda en assolut de dac empirics afidabli de chesta sort y à costituì la basa per les dezijions politiches plu importantes tl ciamp dla politica europeica, tant da fé entratant pert dl savei spezialistich de basa sun chest argoment.
Plu avisa él vegnù documente enlaoura ca. 300 mendranzes con ca. 103 milions de apartenenc te 36 stac europeics. Entratant é chisc numeri cherscius a ca. 350 mendranzes con ca. 107 de apartenenc te 38 stac europeics. L aument é souraldut la conseguenza dla nasciuda de stac nuefs (ultimamenter l Montenegro y l Kosovo). Dal confront anter i dac dl 2000 con chi dl 2013 jaràla ence da argomenté les mudazions y da tré conclujions sce i strumenc per la sconanza dles mendranzes che é jus en forza tl ultim dezen à abù fazion o manco.
L projet vegnirà sclut ju anter l 2015. Dedò él prevedù la realisazion ence de na traduzion per talian y per engleis.