SVI

Soura de nos
Carateristica dl SVI
Ativité dl SVI
Publicazions
Storia dl SVI
Strutura dl SVI
Curricula
Per contaté l SVI
Impressum

Carateristica dl SVI

En confront a d’autres istituzions che se dà ence ju con la tematica dles mendranzes à l SVI la carateristica da ti jì permez al argoment sun la basa dles esperienzes sudtiroleises y con n conzec de autonomia spezifich.
  1. Finalités: l SVI fej sia ativité scientifica con n fin programatich da ruvé a aplicazions pratiches de sies enrescides. Dit con d’autres paroles: la scienza é n meso per arjonje i fins dl Istitut a livel cultural y giuridich. Plu avisa volessa l SVI dé enscì n contribut pratich per l mantegniment linguistich-cultural di doi grups etnics dl Südtirol (i todesc y i ladins dles Dolomites) y dles mendranzes europeiches en general, y chest sun la basa de informazions y argomentazions scientifiches y te n contat strent con personalités dla vita publica che à responsabelté de dezijion te chest ciiamp. Chest implicheia n liam strent anter teoria y pratica.
  2. Program: a la basa dles ativités dl SVI él n program con contegnus definis avisa, che vegn ca da l’esperienza plurienala y direta con l’autonomia dl Südtirol. L SVI volessa mete a desposizion dles autres mendranzes europeiches l savei te chest setour dl Südtirol, y al medem temp, fé conesce tl Südtirol les esperienzes de d’ autres mendranzes tradizionales europeiches. Entrames les ativités dess daidé pro al consolidament dl’autonomia dl Südtirol a livel nazional y internazional.
  3. Esperienzes y rei de colaborazions: per la realisazions de sies finalités po’ l SVI se nuzé dles competenzes che al à arjont te siei passa 50 agn de esistenza. Bele tratant l temp dl prum Statut de Autonomia (fina dl 1971) y dapò tratant la fasa de autuazion dl secont Statut de Autonomia à l SVI madorì de pruma persona n gran numer de esperienzes tl ciamp dla sconanza dles mendranzes. Tl medem temp àl tiesciù na rei strenta de colaborazions scientifiches a livel europeich. Laprò végnel ciamó l gran potenzial de contac che l SVI à con raprejentanc di grups etnics da una na pert y da l’autra con personalités che à responsabelté de dezijion te organisazions nazionales y internazionales (p.ej. Consei dl’Europa, Union Europeica, OCSE y Nazions Unides).
  4. Efizienza: i trei fatours nominés dessoura ti dà al SVI, ence sce (o avisa daviache) sia strutura é relativamenter picera, la poscibelté da laoré con n degré de flessibilité y de efizienza dret aut.