SVI

Soura de nos
Carateristica dl SVI
Ativité dl SVI
Publicazions
Storia dl SVI
Strutura dl SVI
Curricula
Per contaté l SVI
Impressum

Storia dl SVI

L Istitut Sudtiroleis di Grups Etnics (SVI) é na organisazion non-profit de utilité publica. Al é vegnù fondé dl 1960 aldò dl articul 36 dl Codesc zivil talian con l inom Istitut sudtiroleis economich-sozial/Südtiroler Wirtschafts- und Sozialinstitut con la finalité da studié i problems sozio-economics dles does mendranzes dl Südtirol (la todescia y la ladina) y da chirì soluzions concretes tl spirit dla dotrina soziala catolica. L SVI se à dé ju con chesta enciaria statutaria con suzes per passa trenta agn.
Con l temp à endere ence l SVI atualisé y integré i ciamps de sia ativité: al ne fova nia meso da se dé ju con les problematiches sozio-economiches zenza se enteressé tl medem temp a les condizions culturales, formatives y ecologiches dl Südtirol o lascian sun na pert i aspec giuridics dl’autonomia dl Südtirol.
Plu tert, tl cheder dla atuazion dl secont Statut d’autonomia, él vegnù metù su deplù istituzions spezialisedes per l stude dles tematiches sozio-economiches plu emportantes (anter l auter l Istitut per la promozion economica/Wirtschaftsförderungsinstitut, l Istitut per l’enrescida economica/Wirtschaftsforschungsinstitut, l Istitut per la promozion dl laour/ Arbeitsförderungsinstitut, l Ecoistitut/Ökoinstitut y e.i.), enscì che l SVI à podù se dediché a n stude tres plu global dla sozieté sudtiroleisa y de si grups linguistics. Fora dl Istitut sudtiroleis economich-sozial/Südtiroler Wirtschafts- und Sozialinstitut él enscì deventé l Istitut Sudtiroleis di Grups Etnics/Südtiroler Volksgruppen-Institut, che ne se dà nia plu ju demé con aspec parziai, ma con duta la complessité dles problematiches che nasc o che pò nasce da la convivenza de trei grups linguistics desvalifs sun l medem teritore.
Canche les gran mudazions suzedudes tl’Europa dai agn 1990 inant à endò fat vegnì dassen atuala la chestion dles mendranzes, fova la situazion dl Südtirol te n colp tl zenter dl interes europeich: fora de n conflit negatif, che manaciova da generé na spirala de violenza, fòvela juda da ruvé, tres n gran laour de mediazion politica, a na gestion positiva dles contraposizions, y la conzescion dl secont Statut d’autonomia ti à daurì la streda a na convivenza pazifica di trei grups linguistics dl Südtirol. Tl cheder de chesta esperienza vegniva l SVI tres endò damané, ence da foradecà, da informé ogetivamenter, enscì che chi che fova interessés a la soluzion de problems analogs essa podù de nuzé dles esperienzes sudtiroleises.
Les domandes che ti vegn fates te chest contest al SVI fova y é dutaurela dret truepes: tl’Europa él plu de 300 mendranzes nazionales o etniches con dut adum plu de 100 milions de apartenenc (cie che corespon a la setima pert dla popolazion dl continent), de cheles che truepes volessa se nuzé dles esperienzes che é vegnudes fates tl Südtirol. L SVI à dagnora azeté de bona vueia da dé chesta consulenza, da na pert te n spirit de solidarité defront a d’autres mendranzes te situazions manco vantajouses, da l’autra pert ence sciche dilan per l gran aiut che l Südtirol enstes à giaté ti temps plu riei.
L Istitut à tegnù cont de chest svilup ence te sie statut y à amplié dl 1995 sies finalités con chela de contribuì, te n spirit de solidarité y te na maniera costrutiva, a la soluzion dla chestion dles mendranzes tl’Europa tres ativités de enrescida, barat de esperienzes y cooperazion internazionala. Desche ultim vare te chesta direzion s’à l ann do, dl 1996, l Istitut dé l inom de Istitut Sudtiroleis di Grups Etnics/Südtiroler Volksgruppen-Institut. Te chest contest é ence la finalité originara, nia plu atuala te sia limitazion a aspec demé sozio-economics, vegnuda deda su per na finalité plu ampla, che tol ite l stude dla chestion dles mendranzes tl Südtirol da n pont de veduda global.
Anter l 1961 y l 2013 é l SVI y sia ativité vegnus caraterisés te na maniera determinanta da sie diretour da enlaouta, l economist y soziologh Christoph Pan, y chest sibe per cie che reverda l’analisa dles problematiches economich-soziales dles mendranzes dl Südtirol che, do l 1989, l’analisa generala dla chestion dles mendranzes tl Südtirol y tl’Europa. L professour Pan é sté dozent tles universités de Dispruch y Salzburg y é un di maiours esperc de mendranzes a livel europeich. Per sia ativité él vegnù onoré plu iadi con reconescimenc internazionai.
D’otober 2013 ti à l professour Pan sourandé la direzion dl SVI a mans plu joenes. Si suzessour é sen l professour Paul Videsott (professour de Filologia romanza/Ladinistica tla Université Ledia de Bulsan). Con la nomina a diretour de n linguist ladin à l SVI metù plu peis te sia ativité sun la chestion ladina (a livel de contegnù) y sun la linguistica aplicheda tl significat plu lerch (a livel de metoda). Emplù él vegnù metù tl zenter dl’ativité scientifica dl SVI la problematica dles mendranzes plu piceres, che fej fora passa l 80% dles mendranzes dl’Europa y che é particolarmenter al prigo te sia esistenza.
Naturalmenter portarà l SVI inant ence tl davegnì si fin statutar da analisé scientificamenter y te na maniera poscibelmenter globala la chestion dles mendranzes en general, y chilò dantaldut con n azent sun i derc dles mendranzes tl’Europa. Chest laour dess vegnì fat - coche ence i autri laours dl SVI é dagnora vegnus fac -  da n pont de veduda global, interdesciplinar y tl medem temp ence pratich.
Dr. iur. Beate Sibylle Pfeil, giurista (abilitazion da ester vicare aldò dl dert todesch), é dal 1996 inant colaboradessa y dal 1999 inant vizediretoura dl SVI y reprejenteia te chest contest ence la continuité tles ativités y tl orientament dl Istitut. N gran numer de publicazions scientifiches y conferenzes te trueps stac dl’Europa y la direzion editoriala dles revistes Europa Ethnica (2002 – scomenciament dl 2007) y dl Europäisches Journal für Minderheitenfragen EJM (dal 2008 inant) fej de ela na esperta reconesciuda tl ciamp dles mendranzes.